Gerpir er austasti höfði landsins, snarbrattur og hömróttur sjávarmegin, 661 m. hár. Talið er að eitt elsta berg landsins, um 12 milljóna ára gamalt, sé að finna í Gerpi.

Gerpissvæðið er sannkölluð paradís fyrir göngufólk. Ferðafélag Fjarðamanna hefur gefið út göngukort af svæðinu sem er fáanlegt í upplýsingamiðstöðvum og verslunum víða í Fjarðabyggð. 

Björgunarsveit Norðfjarðar tekur nafn sitt eftir þessu sögufræga fjalli. Í fornu máli var til lýsingarorðið gerpilegur í merkingunni garpslegur eða vænlegur. Gerpir kemur einnig fyrir sem ýmist mannsnafn eða viðurnefni í Íslendingasögum, bæði Njálssögu og Grettissögu.