Hátíðardagskráin er bæði fjölbreytt og skemmtileg með tónleikum, útiskemmtun á sviði, brekkusöng og dansleik svo að dæmi séu nefnd. Þá er þessi skemmtilega sumarhátíð örugglega sú eina á landinu sem heldur Íslandsmeistaramót í franska kúluspilinu Pétanque.

Á tónleika- og dansleikjadagskránni má nefna tónleika með Svavari Knúti og Kristjönu Stefánsdóttur, Eiríki Hafdal og Hundi í óskilum, harmonikkudansleik og Rokkabillýbandið ásamt Matta Matt sem sjá um stuðið á alvöru sveitaballi.

Franskir dagar eru síðan einnig lífsstílsdagar með holla og hressandi hreyfingu í boði. Má þar nefna hjólreiðarkeppnina Tour de Fáskrúðsfjörður og Fáskrúðsfjarðarhlaupið.

Fáskrúðsfjörður er stundum kallaður franski bærinn og ekki af ástæðu lausu. Franskir skútusjómenn voru snar þáttur í bæjarlífinu á 18. og 19. öld og reyndar alveg fram á 20. öldina. Það er ekki fyrr en upp úr 1920 sem frönsku skútunum fer fækkandi í firðinum. Tengslin við gömlu sjávarbæina á norðurströnd Frakklands eru enn sterk. Til marks um það eru götuskiltin á Fáskrúðsfirði bæði á íslensku og frönsku. 

Safnið Frakkar á Íslandsmiðum og Franski spítalinn byggja einnig á þessari skemmtilegu frönsku arfleifð. Safnið er staðsett í undirgöngum sem tengja saman Franska spítalann og Læknishúsið. Einnig er áhugaverð sýning á vegum safnsins í anddyri Læknishússins sem fjallar um merka sögu spítalans. Aðalhönnuður safnasýninga er leikmyndahönnuðurinn Árni Páll Jóhannsson og þykir safnið með þeim glæsilegri á landinu.