Þann 1. júlí árið 1940 bar breska herinn að landi í Reyðarfirði. Þorpið, sem taldi rétt rúmlega 300 íbúa á þessum tíma, var bókstaflega í hers höndum, en í jákvæðum skilningi þó. Í hönd fór tími framfara og atvinnuuppbyggingar með svipuðu móti og á höfuðborgarsvæðinu.

Á Hernámsdeginum er þessa viðburðar minnst með hernámsgöngu, braggabíói, setuliðsskemmtun og öðru tilheyrandi. Bæjarlífið fær á sig annan brag. Sjá má hermenn og hertrukka fara um bæinn, hægt er að gæða sér á fish‘n‘chips á veitingastöðum og taka þátt í hernámshlaupi, svo að fátt eitt sé nefnt.

Þá er braggabíóið í Íslenska stríðsárasafninu endurvakið í tilefni dagsins með sýningum á sígildum kvikmyndum frá  stríðsárunum.

Hernámsdagurinn á Reyðarfirði er haldinn síðasta sunnudaginn í júní eða fyrsta sunnudag júlímánaðar.